बुलडाणा : समृद्धी महामार्गावर केमिकल घेऊन जाणाऱ्या ट्रकला भीषण आग लागल्याची धक्कादायक घटना समोर आली आहे. आग लागताच चालकाने खाली उडी मारल्याने त्याचा जीव वाचला आहे. परंतु ट्रक जळून खाक झाला आहे. परिणामी समृद्धी महामार्गावरील वाहतूक खोळंबल्याचं पाहायला मिळत आहे. बुलढाणा जिल्ह्यातील मेहकर नजीक ही घटना घडली आहे.
नाशिकहून नागपूरच्या दिशेने केमिकलची वाहतूक करत असलेल्या भरधाव ट्रकला मध्यरात्री अचानक आग लागली. बुलढाण्याजवळील मेहकर जवळ ही घटना घडली असून आग लागल्याची घटना समजताच चालकाने खाली उडी मारली. त्यामुळे ड्रायव्हरचा जीव वाचला असून ट्रक आगीत जळून भस्मसात झाला आहे. या घटनेत कोणतीही जीवीतहानी झालेली नसली तरी ट्रकमधील संपूर्ण केमिकल जळून खाक झाले. समृद्धी महामार्गावरील नागपूरकडे जाणाऱ्या मार्गिकेवर ट्रक जळून खाक झाल्याने कॉरिडॉरवरील वाहतूक काही काळ थांबवावी लागली होती. अपघाताची माहिती मिळताच स्थानिक नागरिकांनी तातडीने घटनास्थळी धाव घेत बचावकार्य सुरू केलं. ट्रक अपघाताच्या घटनेनंतर समृद्धी महामार्गावर काही वेळ वाहतूक खोळंबली होती. त्यानंतर आता वाहतूक सुरळीत करण्यात आली आहे.
समृद्धी महामार्गावरील अपघात टाळण्यासाठी वाहतूक विभागाकडून अनेक उपाययोजना करण्यात येत आहेत. वाहनांची तपासणी, टायर तपासणी करुनच वाहनांना समृद्धी महामार्गावर प्रवेश दिला जातो. तरी देखील टायर फुटण्याच्या घटना घडत आहेत.
