अकोला: अकोला शहरातही राष्ट्रवादी काँग्रेसच्या ओबीसी सेलचे महानगराध्यक्ष अनिल मालगे यांनी अनोख्या पद्धतीने अजित पवारांना समर्थन दिले. अनिल मालगे यांनी आपल्या दुचाकीवर अजित पवारांच्या समर्थनाचे मोठे छायाचित्र लावून ते शहरात फिरत आहेत. त्यांच्या या कृतीची शहरात चांगलीच चर्चा होत आहे.
राष्ट्रवादी काँग्रेसमध्ये अनिल मालगे हे गेल्या अनेक वर्षांपासून सक्रियपणे कार्यरत आहेत. त्यांच्यावर ओबीसी सेलच्या महानगर अध्यक्ष पदाची जबाबदारी आहे. अजित पवार यांचे सुरुवातीपासूनच ते कट्टर समर्थक राहिलेले आहेत. अजित पवार यांनी सत्ताधाऱ्यांना समर्थन देऊन उपमुख्यमंत्री पदाची शपथ घेतल्यानंतर जिल्ह्यातील अनेक नेत्यांनी त्यांना पाठिंबा दिला आहे. दुचाकीवर अजित पवार यांच्यासह राष्ट्रवादी काँग्रेसचे राष्ट्रीय कार्याध्यक्ष प्रफुल पटेल, प्रदेशाध्यक्ष सुनील तटकरे, ज्येष्ठ नेते छगन भुजबळ, अमोल मिटकरी, माजी आमदार प्रा. तुकाराम बिडकर यांच्यासह स्थानिक नेत्यांचे छायाचित्र असलेला एक मोठा फलक अनिल मालगे यांनी दुचाकीवर समोर लावून अनोख्या पद्धतीने आपले समर्थन दर्शवले आहे. त्यांची ही कृती चर्चेचा विषय ठरत आहे.
