Mumbai | मुंबई : भारताच्या अर्थमंत्री निर्मला सीतारमण, रिझर्व्ह बॅंकेचे गव्हर्नर शक्तीकांत दास, बॅंकांचे अन्य मोठे अधिकारी तसेच भारत सरकारचे काही मंत्र्यांनी खुप मोठा भ्रष्टाचार केला आहे. भारतीय बॅंकांची लूट केल्यामुळे निर्मला सीतारमण व रिझर्व्ह बॅंकेचे गव्हर्नर शक्तीकांत दास यांच्या राजीनाम्याची मागणी करत मुंबईतील रिझर्व्ह बॅंक, (RBI) एचडीएफसी बँक ( HDFC) आयसीआयसीआय बँकेसह (ICICI) 11 ठिकाणी बॉम्ब ठेवण्यात आल्याची धमकी मंगळवारी दुपारी रिझर्व्ह बॅंकेच्या अधिकृत ई-मेलवर आल्याने दहशत निर्माण झाली.
दुपारी दीड वाजता बॉम्ब ब्लास्ट होणार असल्याचे ई-मेल मध्ये म्हटले होते. खिलाफत इंडिया या ईमेलवरून ही धमकी देण्यात आली. होती. (Khilafat India Threat Of Bomb Blast At Reserve Bank Of India Mumbai And 11 Other Places)
भ्रष्टाचारात सहभागी असलेल्या सर्वांवर कारवाई करावी अन्यथा जे करायचे ते करू, असे या ई-मेल मध्ये नमूद होते. धमकीचा ई-मेल प्राप्त होताच रिझर्व्ह बॅंकेने पोलिसांना माहिती दिली. मुंबई पोलिसांनी बॉम्ब शोध पथकाच्या मदतीने शोध घेतला. मात्र कोणतेही आक्षेपार्ह साहित्य आढळले नाही. एमआरए मार्ग पोलिस ठाण्यात याप्रकरणी गुन्हा दाखल करण्यात आला आहे. धमकीचा हा ई-मेल कुठून करण्यात आला, तसेच तो करण्यामागील कारणांचा शोध पोलिस घेत आहेत.
