अमरावती : भरधाव ट्रकने टाटा एस वाहनाला दिलेल्या जबर धडकेत पाच जण जागीच ठार झालेत. अमरावती जिल्ह्यातील दर्यापूर-अंजनगाव मार्गावर हा भीषण अपघात सोमवारी रात्री उशिरा घडला. मृतकांमध्ये दोन बालके, दोन महिला आणि एका पुरुषाचा समावेश आहे. अमरावती जिल्ह्यातील खल्लार पोलिसांनी ही माहिती दिली.
लेहगावजवळ सोमवारी रात्री उशिराच्या सुमारास एका कुटुंबातील १२ प्रवासी टाटा एस वाहनाने प्रवास करीत होते. लेहगावजवळ त्यांच्या वाहनाला ट्रकने विरुद्ध दिशेने समोरासमोर जबर धडक दिली. यात एकाच कुटुंबातील पाच जणांचा जागीच मृत्यू झाला. घटनेची माहिती मिळताच लेहगावच्या ग्रामस्थ आणि खल्लार पोलिसांनी अपघातस्थळ गाठत मृतक व जखमींना दर्यापूरच्या रुग्णालयात हलविले. डॉक्टरांनी तपासणी केल्यानंतर पाच जणांना मृत घोषित केले. प्राथमिक उपचारानंतर उर्वरित जखमींना अमरावतीच्या जिल्हा सामान्य रुग्णालयात हलविण्यात आले. जखमींमध्ये लहान बालकाचाही समावेश आहे. याप्रकरणी खल्लार पोलिसांनी गुन्हा नोंदविला आहे.
