Yavatmal : यवतमाळ येथील पाटणबोरी परिसरात एका इसमाच्या घरातून पोलिसांनी गांजा जप्त केला आहे . पोलिसांना एका खोलीत पांढऱ्या रंगाच्या गोणीत हिरवट, काळपट गांजा ज्यात पाने, फुले, देठ आदी वनस्पती असलेला एकूण 5 किलो 271 ग्राम वजनाचा 63 हजार पाचशे 76 रूपयांचा गांजा आढळला.
जिल्ह्यात अंमलीपदार्थाची तस्करी सुरू असून, शाळकरी मुलेही नशेच्या आहारी गेली आहेत. जिल्ह्यातील अनेक ठिकाणावरील कारवाईवरून हे दिसून येते. याबाबतचे गांभीर्य लक्षात घेत जिल्हा पोलिस अधीक्षक डॉ. पवन बनसोड यांनी अंमलीपदार्थ विक्री करणाऱ्यांविरूद्ध कारवाईचे आदेश स्थानिक गुन्हे शाखेला दिले. त्यानुसार ही कारवाई करण्यात आली. घटनास्थळी पंचनामा करून पांढरकवडा पोलिसांनी गंगाधर पत्रीवार (रा. पाटणबोरी) याचेविरूद्ध गुन्हा दाखल करून त्याला ताब्यात घेतले आहे.
