वाशीम : दोन युवकांवर वैयक्तिक वादातून पिस्तुलीने गोळीबारासह कोयत्याने वार करून जीवे मारण्याचा प्रयत्न करणाऱ्या दोन संशयितांना जेरबंद करण्यात वाशिम शहर पोलीसांना यश आले आहे.
पोलिसांनी गुप्त माहितीच्या आधारे हिंगोली जिल्ह्यातून या दोन युवकांना ताब्यात घेतले आहे. १४ ऑगस्टच्या रात्री निमजगा ते वाळकी मांजरे रोडवर जुन्या वैयक्तिक वादातून दोन युवकांवर पिस्तुलीने गोळीबारासह कोयत्याने वार करून प्राणघातक हल्ला चढविण्यात आला होता. या प्रकरणी फिर्यादीच्या तक्रारीवरून वाशिम शहर पोलिस संशयितांच्या मागावर होते. गोपनीय माहितीवरून वाशिम शहर पोलिसांच्या तपास पथकाने या प्रकरणातील दोन संशियतांना हिंगोली जिल्ह्यातून ताब्यात घेतले. या दोघांना कनेरगाव नाका (जिल्हा हिंगोली) येथून ताब्यात घेतल्यानंतर त्यांच्यावर अटकेची कारवाई करण्यात आली. पोलिस उपनिरिक्षक सचिन गोखले प्रकरणाचा तपास करीत आहेत.
