अकोला : अकोल्यातील भाजप कार्यालयात सोमवारी अज्जू ठाकूर याचा पक्षाचे प्रदेश सरचिटणीस आणि आमदार रणधीर सावरकर यांच्या प्रमुख उपस्थितीत पक्षात प्रवेश झालाय. अज्जू ठाकूर हा अकोल्यातील कुख्यात गुंड म्हणून ओळखला जातोय. त्याच्यावर अनेक पोलीस स्टेशनमध्ये मारहाण, खुनाचा प्रयत्न, खंडणीसह इतर गंभीर गुन्हे दाखल आहेत.
सोमवारी टोपले सभागृहात भाजप कार्यालय इथे अजय ठाकूर, मोहिनी ठाकूर, प्रीती गावंडे, विश्वमाला वाणी, किरण इंगळे, सागर गायकवाड, प्रशांत इंगळे, मनोज पारस्कर, मंगेश राजपूत, किरण पांडे, निलेश मोरे, वैभव उंबरकरसह बहुसंख्य महिला आणि तरुणांनी भारतीय जनता पक्षामध्ये प्रवेश घेतला. यावेळी प्रमुख अतिथी म्हणून माजी महापौर विजय अग्रवाल, महानगर अध्यक्ष मसने, अनुप धोत्रे, अनिल नावकार, मिलिंद राऊत उपस्थित होते. दरम्यान अज्जू ठाकूर याच्या भाजप प्रवेशानंतर सोशल मीडियावर चांगला ट्रोल होत आहे.
अज्जू ठाकूर हा अकोला शहरातील कुख्यात गुंड म्हणून ओळखला जातोय. त्याच्यावर अनेक पोलीस स्टेशनमध्ये मारहाण, खुनाचा प्रयत्न, खंडणीसह इतर गंभीर गुन्हे दाखल आहेत. साडेतीन वर्षांपूर्वी म्हणजेच अकोला पोलिसांनी १८ एप्रिल २०२० जठारपेठ आणि उमरी भागात गुंडागर्दी करणाऱ्या अज्जू ठाकूर याची रस्त्यानं धिंड काढली होती. एरवी गुंडागर्दी आणि दादागिरी करणारा अज्जू ठाकूर यावेळी चक्क रडताना अकोलेकरांना दिसला.अकोल्यातील कुख्यात गुंड अज्जू ठाकूरच्या टोळीनं जिल्ह्यातील ग्रामीण भागात अक्षरश: खोटे पोलीस बनत उच्छाद मांडला होता. १४ एप्रिल २०२० च्या रात्री या टोळीनं धोतर्डी गावात पोलीस असल्याचं सांगत गावकऱ्यांना मारहाण केली होती. यानंतर गावकऱ्यांनी या गुंडांना पकडून चांगलाच चोप दिला होता. या टोळीनं जिल्ह्यातील यावलखेड, धोतर्डी, दहीगाव गावंडे, सांगळूद, एकलारा, घुसर, चाचोंडी या गावांत आपली दहशत पसरवली होती.
